Raporti i fundit mbi punën e oficerëve të sigurisë në shkolla vë në dukje se në gjimnaze janë mjaft të pranishëm fenomenene si bullizmi dhe dhuna, si në klasa dhe jashtë saj, me dhe pa praninë e mësuesve.
Në katër muaj janë raportuar plot 265 incidente, çka përkthehet në mesatarisht dy incidente në ditë, të cilat janë zgjidhur (apo janë në proces) nga personat e punësuar këtë vit shkollor posaçërisht për këtë punë.
Në rolin e një ndërmjetësi, midis nxënësve, prindërve e mësuesve, oficerët e trajnuar kanë arritur të konstatojnë vetë më shumë se gjysmën e incidenteve të ndodhura (60,4 për qind). Një argument shtesë ky që projekti për sigurinë, qysh në vitin e parë të tij, po funksionon. Por, sa efektivë rezultojnë të kenë qenë ata?! Sipas rasteve të mbledhura, nga 265 incidente, 238 prej tyre janë zgjidhur plotësisht, ndërsa vetëm 8,3% e tyre apo 22 raste rezultojnë me zgjidhje të pjesshme.
RAPORTI
Në morinë e situatave problematike midis të rinjve, bullizmi është shqetësimi kryesor. Gati 15% të rasteve, të raportuara apo konstatuara kanë të bëjnë me këtë fenomen. Po aq problematike janë edhe kërcënimet, moszbatimi i rregullores së shkollës, vjedhjet, shantazhet e deri te dhuna psikologjike e prishja e pronës.
Lloji i incidentit me numrin më të madh të raportimit është dhuna fizike, me 36,2% të rasteve. Sipas raportit, oficerët e sigurisë janë ata që kanë konstatuar shumicën prej tyre, por nuk mungojnë edhe raportime nga nxënës, stafi pedagogjik, familjarë apo qoftë edhe roja e shkollës. Të vendosur në çdo qytet të vendit, oficerët e sigurisë, që në fakt nuk janë as policë e as mësues, janë vendosur qëllimisht persona të arsimuar të rinj, me qëllim që të gjejnë gjuhën e komunikimit me adoleshentët.
Sidoqoftë, Tirana, Shqipëria e Mesme dhe pjesa juglindore duket se kanë të rinjtë më problematikë, pasi nga këto qytete janë raportuar incidentet më të shumta në numër. Klasat, oborri i shkollës e korridoret duket se janë vendet ku ndodhin më shumë zënka. Por çudia më e madhe është se ato pranohen se ndodhin edhe në prani të mësuesve. Koha e largimit nga shkolla dhe ambientet sportive janë gjithashtu “të pëlqyera” nga të rinjtë për t’u zënë.
Por, edhe pse oficeri i shkollës është aty, jo të gjithë preferojnë të flasin me të. Më pak se gjysma e rasteve (49,5%) rezultojnë ta kenë bërë këtë, ndërsa pjesa tjetër jo. Më problematik është fakti që në 30% të rasteve, incidenti ka pasuar në lëndime fizike. Nga katër muaj vëzhgim, gati gjysma e tyre mësohet të kenë ndodhur brenda majit (45,8%), kur edhe pretendohet të jetë konsoliduar më tepër prania e oficerëve në gjimnaze.
TË DHËNAT MBI INCIDENTET
265 incidente në katër muaj, nga të cilat:
10 në ambiente sportive
35 në korridore
5 gjatë ardhjes në shkollë
66 në oborr
3 në tualet
28 gjatë largimit nga shkolla
75 në klasë me/pa mësues
44 ambiente të ndryshme
Llojet e incidenteve:
38 bullizëm
23 kërcënime
25 rregullorja e shkollës
9 vjedhje
52 raste të tjera
4 dhunë psikologjike
4 shantazhe
4 prishje e pronës