Të dhënat zyrtare të ministrisë së financave flasin për një borxh rreth 6,2 miliardë lekë që bashkitë kanë krijuar, ekuivalent kjo me 2200 lekë për frymë. Qeveria ka dhënë ultimatumin që këto detyrime duhet të paguhen, në të kundërt, në krye të bashkive problematike do të vendoset një administrator i përkohshëm për menaxhimin e financave.

Por një zerim i tillë i borxheve është thuajse i pamundur për një pjesë të bashkive, kryesisht atyre të vogla. Ndaj Agron Haxhimali, drejtor ekzekutiv i Shoqatës së Bashkive apelon qeverinë që të ndërhyjë menjëherë.

“Vetë kryetarët pranojnë që janë totalisht në kolaps. Borxhi vazhdon të mbetet gangrenë, dje dhe sot, ndaj është detyrë kryesore e Qeverisë të ndërhyjë në këtë sistem. Ato do të vazhdojnë të kenë probleme në realizimin e funksioneve, shërbimeve dhe kompetencave, çka përkthehet mungesë e theksuar në shërbime për qytetarët”, tha Haxhimali.

Haxhimali shprehet skeptik mbi udhëzimin e Ministrisë së Financave për vendosjen e një administratori në krye të bashkive që nuk shlyejnë dot borxhin, pasi sipas tij kjo cenon autonominë e pushtetit vendor. “Ndërhyrje të tilla prekin autonominë, demokracinë dhe legjitimitetin e të zgjedhurve vendorë. Nuk mund të imagjinohet që kryetari i bashkisë të zëvendësohet nga një i emëruar nga Ministria e Financave”, tha Haxhimali.

Por një veprim i tillë është detyrim ligjor, thotë Fran Brahimi, drejtor për financat vendore në Ministrinë e Financave dhe Ekonomisë. “Nuk është kërcënim i autonomisë vendore, përkundrazi, është shëndoshje e autonomisë vendore. Është vetëm për të shëruar nga ana financiare një njësi vendore që ndodhet në vështirësi”, tha Brahimi.

Sipas Agron Haxhimalit, aktualisht një pjesë e bashkive janë në kolaps dhe nuk arrijnë dot të paguajnë as sigurimet e punonjësve.