Teatri Kombëtar Eksperimental "Kujtim Spahivogli" bën me dije se shfaqjen tetar9ore “Mbretëresha e bukurisë nga Leenane” do të vijojë deri të dielën në skenë për publikun. Vepra e Martin McDonagh me regji nga Kiço Londo deri tani është vlerësuar dhe mirëpritur nga publiku. “Emocion, humor, dhimbje, rebelim dhe duartrokitje pa fund na kanë shoqëruar nga premiera deri më sot. "Mbretëresha e bukurisë nga Leenane" do keni mundësinë ta ndiqni nga sonte deri të dielën ora 19:00”, njofton teatri.
Marrëdhënia midis një nëne egoiste, e gatshme të bëjë gjithçka për mos të mbetur vetëm, dhe një vajzë, së cilës i duket se po i ikën jeta nga duart. Është kjo historia me nota të errëta dhe komike e autorit Martin McDonagh, sjellë nëpërmjet lojës fantastike të aktorëve Laura Nezha, Ermira Gjata, Genci Fuga, Engjëll Hoxha. Vepra, e vendosur në malet e Konemarës në kontenë Galluej të Irlandës, rrëfen historinë me nota të errëta komike të Morin Folanit, një grua e zakonshme dhe e vetmuar në të dyzetat, dhe të nënës së saj manipuluese Meg.Ndërhyrja e Megit në mundësinë e parë dhe ndoshta të fundit të së bijës për një lidhje dashurie vë në lëvizje një tren me ngjarje sa komike, aq tmerruese, të cilat çojnë në fundin e pashmangshëm tragjik të pjesës. Mbretëresha e bukurisë nga Leenane” është një kritikë ndaj nacionalizmit irlandez, i cili është toksik dhe anti-modern, ndërkohë që tregon nevojën urgjente për një identitet, që nuk është vetëm modern, por edhe irlandez.
Ndërsa prioritetet e autorit McDonagh sillen te krijimi i komedisë së zezë, fakti që vepra është bërë kaq e famshme tregon vendin voluminoz, që zë ajo në një diskutim më të gjerë mbi luftën për të gjetur një truall të mesëm midis nacionalizmit, që qëndron larg realitetit, dhe modernitetit të zbrazët kulturalisht. Ndërsa Martin McDonagh nuk e drejton gishtin mbi ndonjë lloj shprese apo zgjidhjeje në vepër, cikli zemërthyes i traumës mes personazheve në Linejn paraqet një kritikë kulturale të rëndë dhe të sinqertë. Kjo vepër e cila u ngjit në skenë për herë të parë nga kompania e Druid Theatre në Galluej, Irlandë, më 1 shkurt 1996. Ajo gjithashtu shijoi suksesin e shfaqjeve në Uest End të Londrës, Broduej dhe Of-Broduej. Është kandiduar për çmimin Lorenc Olivier si vepra më e mirë dramatike për produksionin e Londrës, dhe produksioni i Broduejit i vitit 1998 u kandidua për 6 çmime Toni, duke fituar katër.
