“Legjenda e vendit të t’shenjtë” një film me skenar dhe regji nga Eliona Thomaraj rrëfen legjendën e kishës së Laçit, nga shekulli i III deri në shekullin e X të erës sonë. Puna me këtë projekt kinematografik ka angazhuar një grup artistësh, që sipas regjisores Thomaraj është një film familjar. Xhirimet e filmit “Legjenda e vendit të t’shenjtë” kanë mbaruar dhe regjisorja shprehet se përmes këtij projekti ka dëshirën të ruaj kulturën tonë popullore dhe ta bëj sa më interesante atë për të gjithë, që të mund të jetë e dashur dhe familjare. “Unë zgjodha këtë temë, pasi më duket shumë origjinale të rrëfehen legjendat shqiptare në zhanrin e filmit të animuar. Kështu pasuria jonë kombëtare ruhet dhe trashëgohet ndër breza siç edhe e kemi ruajtur deri në ditët tona. Ideja fillestare ishte varfëria e YouTube me filma për fëmijë shqiptarë. Kjo më duket se është edhe detyra jonë si artist, t’i servirim popullit artin tonë. Pra të mbledhim dhe ti materializojmë në filma të animuar legjendat shqiptare, është sfida jonë më e madhe. Filmi u mendua të hynte në target film familjar, pasi legjendat nuk janë të përkthyeshme lehtësisht nga fëmijët. Legjenda është një histori e fshehur”, pohon regjisorja Thomaraj për këtë film, që në vjeshtë pritet të ketë edhe premierën. Një projekt kinematografik, që ka nisur kohë më parë me mbështetjen e Qendrës Kombëtare të Kinematografisë, ku pjesë e tij është dhe aktori i ndjerë Sulejman Dibra. Të tjerë aktorë në film janë dhe Eliona Thomaraj, Andri Ibrahimaj dhe Jon Ibrahimaj. Xhirimet kanë mbaruar dhe regjisorja shprehet se tani po mbyllen dhe vizatimet dhe më pas mbetet postproduksioni. Grupi përbëhet prej 4 profesionistësh të filmit të animuar Bledar Gërcaliu piktor -animator, Artur Bejkollari grafist- postproduksion, Mark Luli kompozitor dhe Andri Ibrahimaj producent. Pjesë e realizimit të projektit janë dhe Simone Farigu skulptor, Elva Belliu kostumografe, Afërdita Onuzi konsulente historike dhe fra. Mirashi konsulent religjioz.