Një pjesëtar i Forcës së Sigurisë së Kosovës po dyshohet se ka keqpërdorur seksualisht një vajzë të moshës 15 vjeçare. Prokuroria Themelore në Gjilan ka treguar se i dyshuari M.S është arrestuar dhe i është caktuar masa e ndalimit prej 48 orësh.
Prokuroria Themelore në Gjilan, njofton se sot, rreth orës 17:30 minuta, ka ndaluar të dyshuarin M.S., pjesëtar i FSK-së, në kohëzgjatje prej 48 orësh, për shkak të dyshimit se ka kryer veprën penale, ‘’Keqpërdorim seksual i personave nën moshën 16 vjeçare’’.

"Ekziston dyshimi i bazuar që më 7 shkurt 2019, në fshatin Mogillë, komuna Viti, i dyshuari M.S., pjesëtar i FSK-së, ka keqpërdorur seksualisht të miturën e moshës 15 vjeçare, me ç’rast si pasojë e abuzimit të njëjtës i ka shkaktuar edhe lëndime trupore, e cila për momentin gjendet në Spitalin Regjional në Gjilan, për tretman mjekësor:, thuhet në njoftimin e Prokurorisë.

Prokuroria brenda afatit ligjor ndaj të dyshuarit do të paraqet kërkesën për caktimin e masës së paraburgimit, në Gjykatën kompetente në Gjilan.

Ky nuk është rasti i vetëm që kohëve të fundit është raportuar për ngacmime seksuale.

Një 16-vjeçare nga komuna e Drenasit ishte abuzuar seksualisht fillimisht nga mësuesi i saj dhe më pas edhe nga polici hetues, kur ajo kishte raportuar rastin në Policinë e Kosovës.

Nxënësja në moshën 16-vjeçare nga Drenasi, kishte shkuar në polici për të denoncuar profesorin e saj. Por, në vend të gjetjes së ndihmës, ajo ka gjetur një “padron” skllavërues policor.

Pas tri dite të publikimit të këtij rasti, janë arrestuar polici hetues, Vesel Vesel, mësuesi, Shkelzen Xhekaj dhe gjinekologu, Fehmi Ahmeti. Po ashtu janë mbajtur dy protesta, njëra në Prishtinë dhe tjetra në Drenas. Gjatë ditës së sotme Kuvendi i Kosovës ka mbajtur seancë të jashtëzakonshëm për këtë rast.