Nga Kastriot Dervishi

Pas përvojës në kampin e parë të Jubës, në prill-tetor 1946, organet e punëve të brendshme menduan për një riorganizim të punës së detyruar. Më 6.12.1946 ministri i Punëve të Brendshme, Koçi Xoxe, kërkoi shfrytëzimin në punë 100% të të burgosurve. Letra e tij, u drejtohej dy ministrive. Ministria e Punëve Botore u vu në lëvizje menjëherë. Në prill 1947 nisën punimet në kënetën e Maliqit, në një prej kampeve më të tmerrshme në vijim, Vloçishtin.

***

Letra

Ministria e Punëve të Brendshme

Dega për Ekzekutimin e Dënimeve

Lënda: Mbi futjen në punë të të burgosurve

Drejtuar: Ministrisë së Punëve Botore dhe Ministrisë së Bujqësisë e Pyjeve

Ndër burgje kemi një numër të konsiderueshëm të cilët ushqehen dhe e shkojnë kohën kot. Në mënyrë që të aktivizohen në punë dhe veçanërisht të ekzekutohet dënimi i dhënë me punë të detyruar nga gjykatat popullore, ky dikaster me anë të organeve vartëse ndër prefektura e ka ngritur si problem futjen e tyre në punë. Me gjithë se deri diku të burgosurit janë futur në punë, prapë se pra nuk është arritur qëllimi i duhur për t’i futur në punë 100%. Kjo ka rrjedhur pse puna nuk ka qenë e organizuar dhe se veglat e mjetet e punës nuk u janë dhënë. Me qenë se seksionet e punëve botore dhe ato të bujqësisë ndër qarqe kanë mjaft punë dhe se u nevojiten krahë pune për plotësimin e planit të pushtetit, lutemi që të urdhërohen seksionet në fjalë që çështjen e futjes së punë të të burgosurve ta ngrenë si problem dhe në bashkëpunim me seksionet e punëve të brendshme, të gjejnë punë të përditshme dhe në vende të përshtatshme, ku mund të futen në punë shumë të burgosur.

Ministri

Koçi Xoxe