Ministrat e Financave të Bashkimit Evropian, gjatë një takimi në Luksemburg, nuk kanë arritur të bien dakord për disa çështje kyçe sa i përket buxhetit të BE-së, dhe ranë dakord të vazhdojnë diskutimet muajin e ardhshëm.

Ministrat diskutuan nëse buxheti i BE-së duhet të financohet nga taksat e dedikuara për të, apo duhet të merret i gatshëm nga buxhetet e 28 vendeve anëtare. Pasi nuk ranë dakord për burimet e financimit të buxhetit, ministrat nuk e kanë diskutuar as shumën e tij.

Ministrat e financave të BE-së, gjatë takimit të tyre, kanë paralajmëruar Italinë se duhet të rikthejë financat e saj publike në përputhje me rregullat e bllokut.

Pothuajse një dekadë pas krizës së borxheve, presidenti francez, Emmanuel Macron, po kërkon që partnerët e tij të zbatojnë ndryshimet në mënyrë që eurozona të jetë më elastike ndaj goditjeve dhe dominimit global të Shteteve të Bashkuara dhe Kinës.