Ushtruesi i detyrës së Sekretarit të Mbrojtjes në SHBA, Patrick Shanahan, tha se Uashingtoni është fokusuar për të ndërtuar mbështetje ndërkombëtare dhe për të bërë një plan veprimi nëse situata vazhdon të përkeqësohet, pas sulmeve në cisternat e naftës në Gjirin e Omanit për të cilat SHBA e fajëson Iranin.

“Ne duhet të bëjmë plane emergjente nëse situata do të përkeqësohet. Po ashtu na duhet të zgjerojmë mbështetjen ndërkombëtare për këtë situatë”, tha ai.

Presidenti amerikan Donald Trump ka akuzuar Iranin për sulmet e 13 qershorit ndaj dy cisternave të naftës.

Ushtria amerikane po ashtu publikoi një video, që tregon, siç thuhet, një ekip nga patrulla e Gardës Revolucionare të Iranit duke hequr një, siç thuhet, minë të pashpërthyer nga njëra anije, pas sulmit.

Zyrtarët i thanë CNN-it se Pentagoni beson se kjo ka qenë një përpjekje e forcave iraniane për të fshehur provat e përfshirjes së tyre.

Megjithatë, Irani ka mohuar çdo lidhje me sulmet.

Zëdhënësi i Ministrisë së Jashtme të Iranit, Abbas Mousavi, i cilësoi akuzat e Uashingtonit si “alarmante” dhe tha se “akuzimi i Iranit për një incident të tillë të dyshimtë është mënyra më e thjeshtë dhe më e përshtatshme për Pompeon dhe zyrtarë të tjerë të SHBA-së”.

Gjiri i Omanit ndodhet pranë Ngushticës së Hormuzit, që është një vendkalim për gati një të tretën e gjithë naftës që tregtohet nga deti