Nga Izmira Ulqinaku
Për çdo vend normal, aq më tepër për një vend që aspiron të hyjë në Bashkimin Evropian, përfshirja e një ministri në trafikun e drogës do të përbënte një prej skandaleve më të mëdha dhe asnjë kryeministër e asnjë qeveri nuk do të kishte moralin të vazhdonte qeverisjen, por do të kishin dhënë dorëheqjen si masën më elementare për t’i hapur rrugë hetimeve. Por ajo çfarë ndodh tek ne, me këtë qeveri dhe këtë kryeministër është diçka jashtë normales, përtej të imagjinueshmes për çdo vend të këtij kontinenti. Madje edhe aty ku udhëheqin autokratë që kanë marrë çdo gjë në dorë, shumë më pak se kjo katrahurë do t’i bënte të tërhiqeshin. Por këta këtu, kaq fort i ka kapur krimi, kaq shumë i janë shitur bandave të trafikut, saqë me imoralitetin më të madh politik vazhdojnë të kapërdijnë skandalet njëri pas tjetrit dhe, në saj të votave të blera me paratë e krimit, vazhdojnë të bëjnë sikur qeverisin. Mbase jemi vendi unik që nga një ministër i brendshëm i drogës kalojmë tek një ministër tjetër i brendshëm i drogës. Nga droga e Tahirit, tek droga e Xhafajt. Kemi një ministër i cili sa erdhi në detyrë bëri me ngut vetingun e policisë. Nxitoi, sepse donte të ndërronte bandën me etiketën “policia që duam” të paraardhësit të tij, me njerëzit që do t’i mbronin të vëllanë dhe aktivitetin e tij. Sot nuk ka shqiptar që nuk e ka të qartë se kjo qeveri po vijon të na mbajë peng, ndoshta në një prej momenteve më të rëndësishëm të këtyre tri dekadave pluralizëm, atë të afrimit me Bashkimin Evropian, drejt integrimit në familjen evropiane. Është pikërisht ky moment që e bën dyfish imperative largimin e Fatmir Xhafajt nga Ministër i Brendshëm që t’i hapë rrugën një hetimi të pavarur dhe të pandikuar nga pushteti që ai mban sot. Policia e Shtetit duhet të çlirohet nga kapja prej klanit Xhafaj, i cili zëvendësoi klanin Tahiri-Habilaj, duke vazhduar të mbrojë krimin dhe trafikun ndërkombëtar të drogës. Por të gjithë e dimë mirë se as Ministria e Brendshme, as Policia dhe as Prokuroria e kapur nga dyshja Rama-Xhafa nuk vepron dhe nuk do të veprojë për sa kohë Fatmir Xhafaj është ministër i Brendshëm. Ashtu siç tha edhe ambasada amerikane, gjykatat janë nën presion apo po blihen. Edhe CDU/CSU u shpreh që Shqipëria nuk ka plotësuar asnjë kusht për hapjen e negociatave, peshqit e mëdhenj janë të paprekur. Akt që na fundosi shpresat për hapjen e negociatave, duke i treguar edhe faktorit ndërkombëtar se kjo qeveri jo vetëm nuk e ka seriozisht çështjen e integrimit, por edhe është pengesa kryesore për integrimin e vendit. Kjo qeveri dhe kjo mazhorancë ka dështuar plotësisht në ndërtimin e një shteti normal. Kanë gjunjëzuar një shoqëri të tërë përmes kapjes së shtetit nga krimi.
