Nga Tritan Shehu

Shqipëria e shqiptarët e tjerë në Rajon nuk mund të qëndrojnë indiferent ndaj Referendumit të 30 Shtatorit në Maqedoni!

Aty u hap zyrtarisht fushata e Referendumit të 30 Shtatorit, për ndryshimet kushtetuese dhe të emrit të saj, në bazë të marrëveshjes me Greqinë.

Rezultati pozitiv i këtij Referendumi konfirmon rrugën evropiane për atë vend fqinj, si dhe i mundëson anëtarësimin e menjëhershëm në NATO.

Ne të kundërt askush nuk mund të parashikoje se në çfarë “skutash” do të vazhdoje të endet ai shtet, duke rrezikuar seriozisht jo vetëm stabilitetin e të ardhmen, por edhe vete ekzistencën e tij, si dhe duke gjeneruar kështu destabilitet në të gjithë Rajonin.

Është shume pozitiv fakti që në tërësi faktori shqiptar aty dhe partitë e tij politike, në qeverisje apo opozite këto, jo vetëm janë shprehur pozitivisht, por dhe janë organizuar që të zhvillojnë një fushate energjike e aktive në favor të “po”-se, në një aleance të përbashkët apo qofte dhe në veçanti.

Pa dyshim kjo shpreh e konsolidon qartësisht pozicionin e aspiratën e madhe të shqiptareve për Evropë e Perëndim.

Ata të cilët duan ta “minojnë” këtë Referendum, janë po ata që në vite krijuan shume probleme artificiale me Greqinë, Brukselin e NATO-n, për të ngritur pengesa të pa falshme në proceset integruese, dhe që sot vazhdojnë të përpiqen ta vendosin vendin e tyre diku larg në Lindje, qofte kjo edhe për llogari të vendeve të treta.

Në këto kushte Shqipëria, Kosova, i gjithë faktori shqiptar në Rajon, duhet të bëhen aktivisht “krahë” për të ndihmuar në një rezultat pozitiv, jetik ky për Maqedoninë.

Dhe ka shume mënyra të tilla demokratike, legale, transparente, aspak në kundërshtim me sovranitetet, që mund të definohen e aplikohen nga neve në koordinim të plote veçanërisht me partitë shqiptare aty, për fitoren e Referendumit, gjë me shumë rendësi për Ballkanin Perëndimor, për të gjithë ne.