Të rinjtë e FRPD-së dhe LRI-së sollën një tjetër risi në protestën e pasdites së sotme, para Ministrisë së Brendshme, ku kërkuan rrëzimin e qeverisë Rama e në veçanti largimin e Xhafaj.

“Një ekspozitë me “meme” nga shumë të rinj që i kanë realizuar për të treguar se nuk e durojnë sot qeverinë e Ramës, këtë sistem antivlerash”, u shpreh deputetja e LSI-së Floida Kërpaçi.

“Në mënyre simbolike, të rinjtë vendosen përpara ministrisë një ekspozite me “meme” të bëra nga të rinj të pa angazhuar politikisht, rrjete të ndryshme sociale si dhe Genc Sejko, te cilat tregojnë se si vepron drejtësia e Edi Rames”, tha Belind Këllici, kreu i FRPD-së.

Ai po ashtu shtoi se kuksianët vazhdojnë të jenë në burg, ndërkohë që Tahiri e Xhafaj janë të lirë, “Kuksianet janë ende ne burg, Tahiri i lirë e Xhafa ministër. Për 3 mije leke fature energjie të pa paguar kryefamiljaret janë shtyre drejt vetëvrasjes, ndërsa Fatmir Xhafa është ministër dhe pse ka fshehur nga drejtësia të vëllanë të dënuar për trafik droge, edhe perse ai është subjekt i ligjit Antimafia për shkak të dënimit me 7 vite burg për trafik droge në Itali të vëllait të tij.

Këto meme pasqyrojnë më së miri ironinë thërresë me të cilen të rinjtë shqiptarë trajtojnë Edi Ramën, Fatmir Xhafen e Saimir Tahirin në rrjetet sociale. Tashmë kjo treshe e cila po bllokon integrimin e Shqipërisë në Europë është trageti kryesor i talljes së të rinjve shqiptarë”.

Protestuesit kërkuan jo vetëm largimin e ministrit të Brendshëm Fatmir Xhafaj, por edhe të Kryeministrit Edi Rama dhe qeverisë së drejtuar prej tij.

Ata po ashtu thanë se protestat do të vazhdojnë deri në rrëzimin e qeverisë së krimit.