Për herë të parë në historinë e vendit një ministër është në gjykatë me akuzën e rëndë të krijimit të organizatës kriminale dhe trafik ndërkombëtar lëndësh narkotike. Çuditërisht ai vazhdon të mbetet pa masë sigurimi arrest me burg, ashtu sikundër të gjithë të pandehurit me këto akuza ndodhen prapa hekurave duke ndjekur gjykimin me këtë masë. 

Sot, prokuroria u kap me procesverbale mangët në karrocën me dosje që i ka dërguar gjykatës. E habitshme pasi për ato dëshmi të trafikantëve, kushërinjve Habilaj, që sot kanë marrë dënim me burg në Itali, prokurorët e parë që kishin dosjen kërkuan lejimin nga kuvendi për arrestimin e Tahirit.
Por , pas një procesi të ndyrë, shkarkime dhe degdisje prokurorësh që kishin dosjen “Tahiri” dhe me vendosjen e kësaj dosjeje në duart e prokurorëve vegla, Saimir Tahiri sot ka luksin të bëjë qesharakun para Krimeve të Rënda. Duhet të kujtojmë fotografinë që propaganda ia doli të shpërndajë me një karrocë me fashikuj, e dosjesh kundër Tahirit, në seancën e parë. Të gjithë mediat pomponin lajmin se për Tahirin është hetuar kaq shumë saqë edhe procesverbalet e tij transportoheshin vetëm me karrocë. Por , sot, 4 muaj pas shpërndarjes së asaj fotoje, gjykata na zbuloi se prokurorët vartës së Donika Prelës na kanë humbur dëshmitë e kushërinjve të Tahirit ku deklaronin bashkëpunimin me të. Teatri vazhdoi edhe jashtë sallës. Saimir Tahiri doli i irrituar nga salla dhe sulmoi prokurorët, një skenë komike ku në fund, kryesorja është që trafikanti Tahiri të fitojë pafajësi.