Partia Demokratike i është përgjigjur ftesës së mazhorancës parlamentare të bërë me anë të Damian Gjiknurit për tryezën e reformës zgjedhore që zhvillohet nesër.

Me anë të sekretarit të Përgjithshëm Gazmend Bardhi, PD shprehet se e ka dorëzuar planin me 5 pika dhe pret që qeveria të miratojë atë.

‘I qëndrojmë deklarimit që kemi bërë në tryezën OSBE. Plani ynë në tryezë, qeveria të shprehet për 5 pikat’, është shprehur Bardhi për mediat e interesuara.

Në tryezën e OSBE për Reformën Zgjedhore, PD mori pjesë, e përfaqësuar nga Ivi Kaso, ku kërkoi që të krijohet një strukturë e posaçme e drejtuar nga ndërkombëtarët dhe me përfaqësues nga opozita dhe mazhoranca.

Më herët, bshkëkryetari i komisionit të Reformës Zgjedhore, Damian Gjiknuri, i ka dërguar sot një ftesë zyrtare Partisë Demokratike që të marrë nesër pjesë në mbledhjen e komisionit. 

Ftesa i është drejtuar përfaqësuesit të PD, Ivi Kaso, të cilit i thuhet të marrë pjesë në mbledhje nesër në orën 10:00, në Kryesinë e Kuvendit.

 “Do të diskutojmë mbi ecurinë e tryezës së 25 shtatorit ku ju morët pjesë”, thuhet nder te tjera.

Ndërkohë, kujtojmë që PD është shprehur se Reforma Zgjedhore nuk mund të bëhet me Gjiknurin në këtë komision, pasi sipas kësaj force politike, emri i tij ka dalë në audio-përgjimet për blerjen e votave në Dibër.