Manchester City kishte humbur të pesta ndeshjet e mëparshme kundër skuadrave angleze në kompeticionet europiane, para sfidës kyçe me Tottenham këtë të mërkurë, që vlente një vend në gjysmëfinalet e Champions League.

Por edhe pse këtë herë ia doli, kjo ishte ndoshta fitorja më e hidhur (4-3), pasi nuk mjaftoi për të siguruar kualifikimin, me Tottenham që arrin një rezultat historik, duke siguruar një vend në katër skuadrat më të mira të kontinentit.

Në minutën e tretë shtesë Raheem Sterling shënon golin e pestë për City-n, por pas verifikimit në sistemin VAR, goli iu anulua për një pozicion jashtë loje të Sergio Agueros gjatë ndërtimit të aksionit. Tifozeritë e të dy skuadrave u ngritën në këmbë, pasi ishte mbyllja më dramatike e një ndeshjeje ku u shënuan 7 gola, ndërsa njëri mbeti “në tentativë”. Tottenham tani do të përballet me Ajax për një vend në finalen e madhe.

Në Oporto, Liverpool fitoi lehtësisht 4-1 kundër vendasve të Portos, falë golave të Mane, Salah, Firmino e Van Dijk, e tani do t’i duhet të ndeshet me Barcelonën në gjysmëfinale.