Milani u mposht mbrëmjen e djeshme në transfertë ndaj Torinos me rezultatin 2-0, duke zbritur në vendin e 6-të, teksa ka komplikuar jashtë mase pozitat për në zonën Champions.

Disfata ndaj Torinos, ka bërë që drejtuesit kuqezinj, Leonardo, Gazidis dhe Maldini, të zhvillojnë një takim urgjent me trajnerin Gattuso, menjëherë pas humbjes, duke diskutuar për ecurinë negative të skuadrës dhe mundësinë e ndryshimit në stol.

Sipas “Sky Sport”, drejtuesit nuk kanë marrë një vendim konkret, teksa do të vendosin në gjakftohtësi për të ardhmen e Gattusos, duke mos marrë vendime të nxituara.

Për momentin duket se trajneri do të konfirmohet deri në fund të sezonit, gjithsesi priten me mjaft interes zhvillimet në orët në vazhdim.

Mediat italiane zbulojnë se tekniku do të largohet në verë, edhe nëse arrihet vendi i katërt dhe drejtuesit kuqezinj janë duke menduar për zëvendësuesin.