Përtej kontratës dhe deklaratave të Xhuzepe Marotës rreth Luçiano Spaletit, mbi këtë të fundit qëndron gjithmonë “hija” e Antonio Kontes. Klubi zikaltër, me në krye vetë administratorin e deleguar zikaltër, janë prej kohësh të tunduar nga ideja për të transferuar në Milano ishtrajnerin e Juves, Çelsit dhe kombëtares italiane. Vetë administratori e ka njohur gjatë epokës bardhezi, ku së bashku kanë fituar katër tituj të Serisë A radhazi.

OPERACIONI – Mbetet për t’u kuptuar nëse do aprovohet një ndryshim, në çdo rast i kushtueshëm ekonomikisht: Konte në Itali kërkohet nga të gjitha klubet “big”, veçanërisht në ambientet interiste.

Nga klubi zikaltër ka pasur një dialog, pavarësisht se në faza paraprake Konte ka informuar krerët e Interit për kushtet: 10 milionë euro neto në sezon (Spaleti aktualisht përfiton 4.5). I gjithë operacioni do kushtonte rreth 60 milionë euro si vlerë totale: 25 milionë euro bruto (përfshi kostot e stafit) për shkarkimin e Spaletit, plus shërbimet e Kontes.

ÇËSHTJE – Në qershor, pasi përpara së gjithash do synohet objektivi Champions, do mësohet diçka më shumë. Jo vetëm rreth Spaletit, por edhe Mauro Ikardit. Bomberi argjentinas pëlqehet nga ishtrajneri “axurr”, ndërsa me Spaletin thuajse me siguri do t’i duhet të largohet. Prej disa muajsh numri 9 është shndërruar në çështje për klubin dhe gjatë kohëve të fundit ka qenë protagonist më shumë jashtë se brenda fushe.

Ultrasit zikaltër e kanë braktisur, ndërsa fotot e fundit në rrjetet sociale nuk po ndihmojnë… Për më tepër dhe çka është më e rëndësishmja, goli me aksion i mungon nga 2 dhjetori. Me një “komandant të hekurt” si Konte, megjithatë, diçka pritet me siguri të ndryshojë… panoramasport