Lidhjet e krimit me politikën ka qenë një refren i përsëritur në masë nga opozita por edhe nga ambasadori Donald Lu. Nga selia e PD-së, Lulzim Basha dhe deputetë demokratë, kanë akuzuar kryeministrin Rama, deputet socialistë dhe përfaqësues të tjerë të lartë të PS-së për lidhje me banda të rrezikshme në vend.

Për një pjesë të këtyre denoncimeve tashmë janë shfaqur edhe prova publike. Vetëm në pak ditë, dy deputet të PS-së janë vënë në qendër të akuzave.

Numri dy i Partisë Socialiste, Taulant Balla pranoi sot njohjen dhe miqësinë me Edmond Begën, i dënuar me 21 vite burg në Itali për trafik droge dhe i arrestuar nga policia greke tre ditë më parë. PD tha se Bega është anëtar i bandës së Lushnjes e cila drejtohej nga Aldo Bare.

Jurgis Çyrbja, deputeti rishtar i zgjedhur në Durrës, rezulton i përgjuar teksa komunikon me personin i cili konsiderohet si krahu i djathtë i Emiljano Shullazit. ‘Duhet të takohemi patjetër’ i thotë Çyrbja shtetasit Gilmando Dani.

Saimir Tahiri, ish-Ministër i Brendshëm, ish-deputet dhe ish-kryetar i degës së PS-së për Tiranë, rezultonte në atë që njihet si ‘Dosja Habilaj’. Në përgjimet, e publikuara nga Politiko.al, dy trafikant droge të cilët janë edhe të afërm të Tahirit, përmendin emrin e tij gjatë bisedave që zhvillonin së bashku, madje në një rast tregojnë edhe dhuratat që i kanë bërë Tahirit, (dy byzylykët dhe kostumi), si shpërblim.

Dy emra të tjerë të denoncuar nga PD janë dy kryebashkiak, Vangjush Dako dhe Qazim Sejdini. Ky i fundit për shkak të dhëndrit të tij, i cili është denoncuar nga zyrtarë demokrat si një nga drejtuesit e një prej grupeve kriminale që vepron në Elbasan, ndërsa Dako për lidhje me Lul Berishën, kjo pasi Bashkia i dërgoi një letër Gjykatës ku shprehej e gatshme për të punësuar Lul Berishën./Politiko.al