Buxheti për menaxhimin e të ardhurave tatimore dhe doganore për vitin që vjen do të pësojë ulje. Konkretisht buxheti për tatimet do të ulet nga 2.7 miliardë lekë që është aktualisht në 2.6 miliardë lekë gjatë vitit që vjen. Por pavarësisht kësaj tatimet synojnë që të rrisin me rreth 10% në vit mbledhjen e të ardhurave tatimore dhe jotatimore përgjatë periudhës 2019–2021.

Në të njëjtën kohë tatimet synojnë që të rrisin raportin e zbulueshmërisë nga kontrollet e kryera nga administrata tatimore te bizneset. Ndërsa buxheti për menaxhimin e ta ardhurave nga doganat do të ulet në 3.6 miliardë lekë nga 3.8 miliardë lekë që është aktualisht. Doganat synojnë që në vitin që vjen të rritet numri i deklaratave doganore të procesuara në kanalin blu (në import) nga 10% e totalit të deklaratave doganore , në 17% .

Ndërsa referuar deklaratave doganore të procesuara në kanalin jeshil (në eksport) do të bëhet një rritje nga 8% e totalit në 14%. Ndërkohë që një rëndësi e veçantë do ti kushtohet edhe shkurtimit të kohës mesatare të parashikuara për një zhdoganim.