Gjykata e Krimeve të Rënda ka rrëzuar kërkesën për lirimin e Klevi Likës, një nga katër të arrestuarit për 3.4 mln eurot e sekuestruar në automjetet ‘Toyota Yaris’ në portin e Durrësit.
Klevi Lika kishte kërkuar lirinë për faktin se dëshiron të vazhdojë shkollën. Kërkesa për ndryshimin e masës ishte bërë nga avokati i tij Saimir Visha, por Prokuroria ka kundërshtuar lirimin, pasi po pret përgjigje nga Belgjika, Anglia dhe Italia për origjinën e parave.
Klevis Lika u arrestuar më 23 qershor, ndërsa shoqëronte ngarkesën e automjeteve ku u gjetën dhe sekuestruan 3.4 mln euro.
Në lidhje me këtë ngjarje në pranga përfunduan edhe Agim Çeka, Edi Lika (Cani), i biri Klevis Lika, si dhe Alban Mollaymeri.
Kushërinjtë e shpallur në kërkim, Alfred dhe Elvis Vladi, sipas Policisë janë porositës së ngarkesës me sasinë rekord të eurove, që u zbuluan në portin e Durrësit. Të dy rezultojnë pronarë biznesesh në Tiranë, por njëri prej tyre, Alfred Vladi, ka në pronësi edhe dy kompani që merren me dhënien e automjeteve me qira.