Policia e Shtetit njofton se ka sekuestruar 1 milion euro pasuri të paluajtshme në Fier të përfituara nga veprimtaria kriminale.
“Në përfundim të veprimeve të kryera, nga ana e Sektorit për Hetimin e Krimit Ekonomik e Financiar në Drejtorinë Vendore të Policisë Fier në bashkëpunim me Prokurorinë e Rrethit Gjyqësor Fier, u zbatua vendimi i Gjykatës së Rrethit Gjyqësor Fier për sekuestro preventive në lidhje me pasuritë e shtetasit: V.Z., 50 vjeç, banues në Fier. Ky shtetas është dënuar nga autoritetet italiane me 32 vjet e 6 muaj burg për veprën penale “Trafiku i narkotikëve” dhe është duke vuajtur dënimin në Itali” njofton policia e Shtetit.
Referuar njoftimit, janë sekuestruar një kompleks shërbimesh në Fier, një apartament me sipërfaqe 70 metra katrorë si dhe një automjet. Ndërkohë, vijon puna për identifikimin e pasurive të tjera që mund të ketë ky shtetas dhe personat e lidhur me të.
