Teksa banorët e Unazës së Madhe kanë nisur protestat, në Agjencië e Prokurimit Publik janë publikuar kompanitë fituese që do të bëjnë zbatimin e projektit për 3 lotet që përfshijnë segmentin nga pallati me shigjeta te sheshi “Shqiponja”.

Në total ky segment ka një gjatësi prej 2.34 km, ndërkohë që vlera e tij me TVSH është 5.98 miliard lekë. Për lotin e parë, që ka një gjatësi prej 0.76 km fitues është shpallur bashkimi i operatorëve “Biba X& DH Albania”, me një vlerë prej 2.24 miliard lekë pa TVSH. Loti 2 do të ndërtohet nga kompania Salillari.

Kosto e kontratës për këtë segment prej 0.84 km është 1.66 miliard lekë, ndërkohë që për segmentin e tretë prej 0.74 km fitues është shpallur kompania “Victoria Invest Internacional & Viktoria Invest” me një vlerë prej 1.17 miliard lekë pa TVSH.

Paralelisht ARRSH po planifikon të ndërtojë edhe një segment të ri nga sheshi Shqiponja te bulevardi i Ri, i cili parashikohet të shtrihet në Veri të kryeqytetit ose ne Jug te Njësisë Administrative të Paskuqanit.

Ndërkaq, ministri i Infrastrukturës dhe Energjisë, Damian Gjiknuri ka deklaruar se Unaza e Madhe do të jetë tërësisht e përfunduar brenda 3 vitesh.