Konsullatat gjermane në vendet e Ballkanit Perëndimor nuk janë në gjendje të përpunojnë kërkesat për viza pune, numri i të cilave është dyfishuar këtë vit. Sipas ‘Spiegel’, vetëm në gjysmën e parë të vitit 2018 u paraqitën 52 mijë kërkesa për viza punë në të gjithë rajoni, dy herë më shumë sesa në të njëjtën periudhë të vitit 2015.

“Numri i kërkesave për viza ka tejkaluar kapacitetet e konsullatave tona, të cilat çojnë në rritjen e numrit të ankesave nga përfaqësuesit e biznesit, politikës dhe shoqërisë civile”, thuhet në dokumentin e Ministrisë Federale të Punëve të Jashtme.

Vizat përfaqësojnë instrumentin kryesor për kontrollin e emigracionit, evidentohet më tej në dokument.

Gjermania kategorizoi Serbinë, Bosnje Hercegovinën, Maqedoninë dhe Shqipërinë si vende të sigurta në vitin 2016, e si rrjedhojë shanset për t’u dhënë azil shtetasve nga këto vende u minimizuan.

Sa i takon vizave të punës, shumica e tyre janë dhënë kryesisht në fushën e ndërtimit, gastronomisë dhe kujdesit mjekësor.