Drejtori i Klan Kosovës, Adriatik Kelmendi, që po ndjek nga afër zhvillimet në Uashington, raporton se presidenti amerikan Donald Trump mund të jetë nesër pjesë e takimit Kosovë-Serbi në Shtëpinë e Bardhë.

Pjesëmarrja ose jo e presidentit amerikan në takimin e 4 shtatorit varet nga fakti nëse delegacioni i Kosovës dhe ai i Serbisë do të arrijnë të dakordësohen sot për marrëveshjet e mundshme.

“Në takim kanë qenë qysh sot edhe pala serbe. Sipas burimeve nga delegacioni i Kosovës do të ketë ndoshta edhe befasi të këndshme. Synohet që të arrihen sot marrëveshjet në mënyrë që nesër të shkohet në Shtëpinë e Bardhë dhe të ndërmjetësojë takimin, siç merr vesh Klan Kosova, edhe vetë presidenti amerikan Donald Trump”.

“Nëse sot do të ketë pajtim mes palëve, pra do të arrihen marrëveshjet, atëherë nesër do të jetë prezent presidenti amerikan Donald Trump për t’i uruar apo nënshkruar ato varësisht se cila formë do të përzgjidhet. Pjesëmarrja e Donald Trump do të varet nga rezultatet e takimeve sot”, ka deklaruar Kelmendi.

Ndërkohë mediat serbe vazhdojnë të insistojnë se presidentit serb, Aleksandar Vuçiç po i kërkohet njohja e Kosovës.

Sipas tyre, në pikën 10 të dokumentit që i është vendosur përpara atij, parashikohet njohja e Kosovës.

Ja çfarë thuhet në këtë pikë sipas Blic:

“Të dy palët angazhohen për njohje reciproke dhe për mbrojtjen e minoriteteve, rikthimin e pronës, zgjidhjen e statusit të personave pa shtetësi dhe pranimin për hapjen e zyrave përgjegjëse për mbrojtjen dhe raportimin vjetor për të drejtat e minoriteteve”.