Në sfond të bisedimeve për 'Minishengenin ballkanik', Shqipëria ka nisur që të vuajë pasojat në fushën e tregtisë dhe pse kushtet e lehtësimit tregtar ende nuk kanë ndodhur.
Pas vërshimit të miellit serb me çmim të lirë që çoi gati në falimentim fabrikat e miellit në Shqipëri më 2017-tën, një kërcënim tjetër ka nisur këtë vit.
Sipas të dhënave konfidenciale nga Drejtoria e Përgjithshme e Doganave, gjatë nëntëmujorit 2019, importet e qumështit të papërpunuar arritën në 13 mijë tonë.
Ndërkohë tonelata me qumësht të pasterizuar importohen nga Serbia dhe shtete të tjera fqinje me Shqipërinë për llogari të fabrikave të mëdha të përpunimit të qumështit në vend.
Arsyeja kryesore se përse fabrikat shqiptare po importojnë qumështin e papërpunuar nga rajoni lidhet me çmimin e lirë sidomos në Serbi, pasi atje i gjithë procesi blegtoral subvencionohet nga shteti.
Nga janari në shtator janë importuar nga Serbia për llogari të fabrikave shqiptare 4.6 tonë qumësht i pasterizuar, duke zënë 38% të totalit të importeve të qumështit me një vlerë mbi 2 milionë euro.
Importues ishin fabrikat më të mëdha në Shqipëri që e përdorën këtë produkt si lëndë të parë.
