Nga Kastriot Dervishi

Në raportin e datës 16.3.1986 të drejtorit të përgjithshëm të Bankës së Shtetit, Andrea Nako, me objekt pasuritë e shtetasve shqiptarë, bëhej e ditur se ishin në plotësim 250 praktika dhe për rreth 200 të tjera po plotësohej gradualisht dokumentacioni. Në Greqi ishin shtëpi banimi, apartamente, hotele, troje, tokë bujqësore, pyje, kullota, magazina, hane, me 118 pronarë. Vlera e pronave vetë në Selanik ishte 35 milion dollarë, ndërsa vetëm në Athinë nga rreth 10 prona të mëdha vlera parashikohej rreth 50 milionë dollarë. Shoqëria përllogariste se vetëm në Greqi vlera e pronave ishte 150 milion dollarë. Por kjo e dhënë ishte e pjesshme sepse nuk përfshinte pasuritë e bllokuara nga ligji i luftës, por vetëm ato të shqiptarëve ortodoksë. Nga një njoftim jo zyrtar, i shtypit grek në vitin 1960, dilte se ishin të bllokuara 76 ndërtesa e apartamente, 30 dyqane, 46 troje, 65 mijë hektarë pyje, 108 mijë kullota dhe 30 mijë hektarë prona të tjera bujqësore. Vlera e këtyre pronave përllogaritej rreth 200 milionë dollarë. Mbi këtë llogari, parashikohej që në Greqi të ishin rreth 300-350 milionë dollarë pasuri (pronat e çamëve nuk llogariten këtu se ishin shtetas grekë).