Shefi i misionit britanik në Tiranë, Hodgson me anë të letrës së datës 10.2.1946 njoftoi E.Hoxhën për largimin nga Shqipëria më 13.2.1946 (pas më pak se një viti qëndrim). Misioni do drejtohej nga majori Makswuell Arnot. Kjo sepse më 20.2.1946 do mbërrinte ministri britanik në Tiranë, S.E. Thomas Cacil Rapp, veprim i cili shënonte edhe vendosjen e marrëdhënieve të rregullta diplomatike. Qeveria komuniste caktoi ministrin e saj në Londër, Vasil Konomin. Mirëpo duket si të shtyrë nga jugosllavët, qeveria komuniste shkaktoi vetë incidente. Fillimisht nuk i dha vizë njërit prej anëtarëve të stafit të ministrit të caktuar britanik, majorit Viktor Smith (në foto, i cili kishte qenë edhe më parë pjesë e misionit britanik britanik). Menjëherë qeveria britanike tërhoqi vendosjen e ministrit të saj në Tiranë.
Më 22.4.1946 qeveria komuniste hoqi dorë nga ndalimi i hyrjes së majorit Smith dhe nga çdo kusht që kishte vënë më parë dhe qeveria britanike reagoi pozitivisht sepse ministri i caktuar po qëndronte në Romë. Fillimisht i ngarkuari britanik në Beograd ia njoftoi ministrit shqiptar atje çështjen e vendosjes së marrëdhënieve diplomatike, por u tërhoq pasdite sepse më 18.5.1946 qeveria komuniste sajoi një incident me anijet britanike në kanalin e Korfuzit (pa dëme materiale e njerëzore). Pas shkëmbimit pa rezultat të disa notave midis dy qeverive, incidenti u përsërit më 22.10.1946 me dëme njerëzore e materiale ndaj anijeve britanike. Marrëdhëniet nuk u vendosën më kurrë. Ideja jugosllave kishte triumfuar.
