Qeveria britanike është kritikuar për një trajtim jo majftueshëm intensiv të situatës së krijuar nga koronavirusi, teksa pasagjerët që kthehen nga Italia nuk po testohen, pavarësisht se i gjithë vendi është në karantinë.

Kompani si British Airways, Ryanair dhe EasyJet ende ofrojnë fluturime drejt dhe prej Italisë, ndërsa pasagjerët tregojnë se në aeroport nuk u kontrolluan për sëmundjen.

E gjithë Italia u vendos në karantinë mbrëmjen e kaluar dhe kryeministri Xhuzepe Konte ka vendosur rregulla të ashpra për transportin.

Pavarësisht kësaj pasagjerët që kthehen nga Italia nuk po kontrollohen. Ish-ministri Rori Stjuart kritikoi përgjigjen e qeverisë ndaj virusit, duke thënë: “Të gjithë pasagjerët që vijnë nga zona të prekura nga koronavirusi duhet të kontrollohen dhe të vihen në karantinë. Nuk ka asnjë justifikim për masa gjysmë të forta.”

Mbrëmjen e djeshme Zyra e Jashtme ndyrshoi këshillat ndaj udhëtarëve britanikë dhe u kërkoi atyre të mos shkonin drejt Italisë, vetëm nëse ishte tejet e nevojshme. Atyre që kthehen prej Italisë iu bë thirrje të vetë-karantinohen për 14 ditë.