Izraeli ka ngritur pompa të mëdha në bregdet që mund të përdoren për të përmbytur tunelet e përdorura nga Hamasi dhe grupe të tjera të armatosura në Gaza dhe për të dëbuar luftëtarët, sipas një artikulli të Wall Street Journal.

BBC nuk ka qenë në gjendje ta verifikojë atë në mënyrë të pavarur. 

Megjithatë, në vitin 2015, ne pamë sesi Egjipti përdori ujin e detit nga Mesdheu aty pranë për të përmbytur një rrjet prej qindra tunelesh përgjatë kufirit të tij me Gazën dhe për t'i dhënë fund një tregtie të lulëzuar të kontrabandës.

Duke cituar zyrtarë amerikanë, Wall Street Journal thotë se ushtria izraelite përfundoi instalimin e pesë pompave në veri të qytetit të Gazës në mes të muajit të kaluar. 

Ai thotë se ata mund të përmbytin rrjetin e gjerë të tuneleve që shtrihen në territorin palestinez brenda disa javësh.

Një faktor ndërlikues do të ishin pengjet izraelite që Hamasi thotë se i ka fshehur në "vende dhe tunele të sigurta".

Përpjekjet për të pompuar ujë të kripur në zona të mëdha në të gjithë Gazën mund të dëmtojnë gjithashtu akuiferin e saj nëntokësor duke ndotur rezervën e saj kryesore ujore.