Deputetja e PD-së, Nadire Meçorapaj ka reaguar lidhur me sjelljen e turpshme që kreu i Bashkisë së Tiranës, Erion Veliaj pati në Komisionin e Medias.

Edhe pse në këtë mbledhje ishte ftuar për të raportuar vetëm Ministrja e Kulturës, Mirela Kumbaro, lidhur me prishjen e Teatrit Kombëtar, në Komision u pa edhe kreu i Bashkisë së Tiranës, Erion Veliaj.

Për Meçorapajn, nga sjellja e Veliajt, parlamentarizmi ka marrë një goditje brutale dhe banale, pasi ai shfaqet në Komision kur t’i teket dhe jo kur e ka datën e përcaktuar.

Reagim i plotë i deputetes:

Parlamentarizimi ka marrë një goditje brutale dhe banale nga Erion Veliaj, kryetari i Bashkisë së Tiranës, delfini i Edi Ramës. Në mungesë të plotë respekti ndaj Parlamentit, Komisioneve, deputetëve dhe ligjeve të vendit, Veliaj vendos të shfaqet kur t’i teket, dhe jo kur e ka datën e përcaktuar për t’u paraqitur para Komisionit të Arsimit dhe Medias.

Para respektit për institucionin më të lartë të vendit, Kuvendin, ai zgjedh një ‘rrugë Barcelone’. Dhe shfaqet i paftuar, refuzon të largohet, bllokon punimet e Komisionit dhe u jep urdhra punonjësve të Gardës.

‘Kryebashkiaku fluturues’ po shkon në Barcelonë nesër në ditën kur është thirrur nga Kuvendi për dëgjesë. Me sa duket ka një tjetër copë Tirane për të shitur.

/55News.al/