Forca të shumta policia rrethuan sot Teatrin Kombëtar por janë larguar pak minuta më parë. Mësohet se Ministra e Kulturës i ka bërë një shkresë Teatrit Kombëtar që të boshatiset sa më shpejt godina e këtij institucioni.
Në lidhje me këtë ka reaguar edhe Aleanca për mbrojtjen e Teatrit Kombëtar e cila deklaron se sot Veliaj ka ka shpallur zyrtarisht konkursin me të cilin kërkon të shembë godinën dhe të grabisë truallin e Teatrit Kombëtar.
Reagimi i Aleancës së Teatrit Kombëtar
Sot, Bashkia e Tiranës ka shpallur zyrtarisht konkursin me të cilin kërkon të shembë godinën dhe të grabisë truallin e Teatrit Kombëtar.
E gjithë kjo procedurë, e cila filloi me VKM-në e publikuar më 3 qershor, bazohet tërësisht mbi një ligj anti-kushtetues i cili e lejon qeverinë të veprojë si një feudal mesjetar. Nëpërmjet këtij ligji qeveria mund të grabisë pasuri publike e private ku e si të dojë dhe t’ua dhurojë klientëve të saj pa pyetur askënd.
Kuptohet që është tejet ironike, e mbase dhe tragjike, që e gjitha kjo po ndodh teksa shqiptarët dëgjojnë vazhdimisht përrallën e “reformës në drejtësi”. Trualli i Teatrit po grabitet pikërisht sepse Shqipëria nuk ka sot një Gjykatë Kushtetuese që do e bllokonte këtë procedurë të çmendur në më pak se 5 minuta.
Nëse komuniteti dhe partnerët ndërkombëtar, “intelektualët” dhe “ekspertët” e paguar prej tyre”, duan të ruajnë sadopak kredibilitetin e tyre, ata duhet të reagojnë sot, qartë dhe publikisht, ndaj kësaj paçavure anti-kushtetuese. Nesër, kur Teatri të mbrohet me forcë, do të jetë tepër vonë!
Fati i Reformës vendoset këtu, në mes të Tiranës, dhe jo në zyrat e fshehta të pazareve politike!
dosja.al
