Tritan Shehu, ish-ministri i Shëndetësisë nga PD, e ka përshëndetur mjaft faktin se nga spitali "Shefqet Ndroqi", i kthyer në spitalin COVID2, u arrit t'i hiqej intubimi me sukses të parit pacient me koronavirus dhe që rastisi të ishte grua.

Por, Shehu thekson në një mesazh se kaq nuk mjafton megjithatë.

"Një mesazh i mirë nga spitali “Shefqet Ndroqi”!- shkruan Shehu. - Një paciente me Covid- 19 pas rreth dy javësh nën respiracion mekanik e intubuar, që prej 24 orësh është extubuar dhe në gjendje të stabilizuar shëndetësore.

Përgëzimet më të mira ekipit reanimator të atij spitali, kolegëve mjekë e personelit në terësi aty për këtë, më shume se lajm të gëzuar që dhanë.

E kuptoj, dikush nga reanimatorët, që e konsideron si rutinë në punën e tyre intubimin, vendosjen në respirator, extubimin etj, do të më thotë kjo është pjesë e punës sonë.

Jam krejt dakort me ata, por dua t’u kujtoj se këto javë ishte krijuar një situatë paradoksale, kur deri dje asnjë pacient nuk u arrit të extubohet me sukses, pa dyshim ky është një fakt që nuk mund e duhet të komprometojë metodë, por që fatkeqësisht po ndodhte, veçanërisht për këto raste akoma me kaq elemente të panjohur e të vështirë.

Shërbimi i reanimacionit, thelbësor në fitoren e jetës, që të ketë sukses, që të prekë statistikat e vendeve të zhvilluara, duhet të përfshihet në standartet e tyre e këtu nuk e kam fjalën vetëm për “respiratorin”, por shumë më gjerë që nga struktura e parametrat e saj, duke vazhduar më tej te monitorimi hemodinamik, shtretërit specialë, laboratorët, imazheria, dializa afër të sëmurit etj etj, me një kosto shumë të lartë këto, për të shkuar pastaj tek niveli profesional, që realisht ekziston.

Këtë nuk duhet ta harrojmë kurrë dhe këtë e qartësoi pikërisht kjo epidemi."