Duke folur në emisionin ‘LOG’ në ABC kryetarja e LSI, Monika Kryemadhi foli mbi zhvillimet e protestave në Tiranë. Ajo tha se është kundër dhunës sepse sipas saj këto akte e bëjnë Edi Ramën nga abuzues në viktimë. Të gjitha dëmet tha ajo do të rregullohen me paratë e taksapaguesve shqiptarë si dhe do t’i japin mundësinë për abuzime qeverisë.

Në filozofinë e Monika Kryemadhit, të shkatërrosh pronën publike, të dalësh e të thyesh xhamat e pronës publike është të bësh Edi Ramën, nga dhunues, nga abuzues, nga kriminel në viktimë. Sepse Klodian Rashën nuk e vranë muret e kryeministrisë, ata policët që nuk kishin maska kundragaz. Klodian Rashën e vrau arroganca e qeverisë.
E para, unë nuk kam pse të bëj një deklaratë publike, për një protestë që nuk e kam thirrur unë.
Vazhdoj dhe të them, kush ushtron dhunë, vandalizëm, bën viktimë Edi Ramën. Sepse ajo pema e vitit të ri që njerëzit e nxorrën dufin, tek një pemë, ajo pema e vitit të ri nëse është blerë me 5 milionë lekë, tani do të shkojnë për ta blerë 50 milionë lekë. Me paratë e taksapaguesve shqiptarë, nuk do të paguhet ajo as me paratë e taksave të oligarkëve sepse nuk paguajnë ata, pasi dalin të gjithë me humbje, nuk do paguhet as me taksat e Edi Ramës, se nuk paguan asnjë taksë, as me taksat e qeverisë, por do të paguhet me paratë e taksave të atyre që ishin atje.