Prokuroria e Posaçme Kundër Korrupsionit dhe Krimit të Organizuar ka bërë një njoftim për mediat në lidhje me nisjen e hetimit për përgjimet e ‘Ndranghetas’ për përmenden dhe përfshihen edhe politikanë shqiptarë.

Për këtë hetim është thirrur në Romë, kreu i SPAK Arben Kraja dhe disa prokurorë. Këta të fundit kanë zhvilluar një takim koordinues me kreun e Antimafias Italiane, Federico Cafiero de Raho dhe prokurorët që kanë zhvilluar hetimin.

Më poshtë njoftimi publik i SPAK:

Mbi procedimin penal nr.17, datë 25.01.2021

Prokuroria e Posaçme Kundër Korrupsionit dhe Krimit të Organizuar me datë 25.01.2021, ka regjistruar kryesisht procedimin penal Nr.17/2021, për veprat penale ‘Korrupsioni pasiv i personave që ushtrojnë funksione publike’, ‘Grupi i strukturuar kriminal’, ‘Pastrimi i produkteve të veprës penale ose veprimtarisë kriminale’ të kryera në kuadër të grupit të strukturuar kriminal dhe ‘Kryerja e veprave penale nga organizata kriminale dhe grupi i strukturuar kriminal’, parashikuar nga nenet 259, 333/a, 287 – 28/4 dhe 334 i Kodit Penal.

Regjistrimi i këtij procedimi penal është bërë mbi bazën e disa artikujve të publikuara në media të ndryshme, në lidhje me hetimet e kryera nga Prokuroria Antimafia e Catanzaros në Republikën e Italisë, të cilat hedhin dyshime në lidhje me përfshirjen e shtetasve shqiptarë dhe të huaj, në aktivitete kriminale në Republikën e Shqipërisë,

Në kuadër të sqarimit të rrethanave dhe fakteve që lidhen me objektin e hetimeve të këtij procedimi penal, sot me datë 04.02.2021 në selinë e Drejtorisë Kombëtare Antimafia dhe Antiterrorizëm në Romë, u zhvillua një takim koordinativ. Takimi u realizua nën drejtimin e zotit Federico Cafiero de Raho, Drejtues i Prokurorisë Kombëtare Antimafia dhe Antiterrorizëm, Itali dhe zotit Arben Kraja, Drejtues i Prokurorisë së Posaçme, Shqipëri, me pjesmarrjen dhe të prokurorëve italianë dhe shqiptarë që hetojnë këto dy procedime penale në shtetet respektive.

Prokuroria e Posaçme kundër Korrupsionit dhe Krimit të Organizuar garanton publikun se është e vendosur për të hetuar deri në fund çdo element dhe fakt që përbën indicje për veprimtari kriminale të kryer në territorin e Republikës së Shqipërisë dhe që lidhet me objektin e hetimeve të kryera deri tani nga Prokuroria Antimafia e Catanzaros