Në Ditën Ndërkombëtare të Lirisë së Shtypit, Presidenti Meta jep një mesazh duke theksuar se “kjo ditë i gjen shumicën e mediave shqiptare nën censurën e Qeverisë dhe kontrollin e oligarkisë”.

Më tej, kreu i Shtetit shprehet se pseudoliritë prodhojnë vetëm regjime me pseudo-demokraci, ndaj dhe sipas tij, duhen mbrojtur e inkurajuar gazetarët.

Në vijim mesazhi i plotë i Presidentit Ilir Meta

Dita Ndërkombëtare e Lirisë së Shtypit i gjen shumicën e mediave shqiptare nën censurën e Qeverisë dhe kontrollin e oligarkisë.

Fondet publike dhe burimet e dyshimta financiare vazhdojnë të përdoren gjerësisht për të cenuar lirinë e shprehjes, për të fshehur të vërtetat dhe për të shmangur llogaridhënien.
Dhuna dhe kërcënimet ndaj gazetarëve janë shpeshtuar, së bashku me censurën dhe autocensurën.
Liria e medias është thelbësore për demokracinë.

Ne duhet të mbrojmë dhe inkurajojmë çdo ditë gazetarët kurajozë në punën e tyre. Ata duhet të ndihen të sigurtë dhe të kenë qasje të plotë në informacionin që i shërben interesit publik, pa pritur që lirinë e shprehjes t’ua servirë politika apo grupet e saj klienteliste.
Pseudo-liritë prodhojnë vetëm regjime me pseudo-demokraci