Lideri historik demokrat, Sali Berisha, i dërgoi disa herë mesazh kryeministrit Edi Rama nga konferenca për shtyp.

“Ne po ndjekim me rigorozitet ligjet ekzistuese. I them Edi Ramës hiq dorë se do të hysh në histori si daja yt, që kërkonte të bllokonte pluralizmin me tanke. Mos u shërbe me pengje e stërpengje, idealet e demokratëve nuk mund t’i mposhtë askush. Kurse peng-kryetarit nuk kam më një mesazh të veçantë sepse ai komandohet nga pengmarrësi, por i them me 11 dhjetor je i ftuar të vish në Kuvendin e PD.

Peng-kryetarit i them se shitja që i ke bërë shpirtit tënd është vepër e jotja, jo e demokratëve. Nuk janë demokratët që kanë ndërtuar dosjen e pengmarrjes tënde. I them se ke që nga shtatori deri më sot, i ndryrë brenda katër mureve. Nuk takon dot anëtarë, madje as qytetarë pa parti, sepse nuk është kollaj që këta të fundit t’i japin dorën një të pabesi. Po të mos ishte foltorja, ai do preferonte të rrinte 80 vjet në opozitë,” tha Berisha.

Ai deklaroi disa herë, se rendin e ditës së Kuvendit Kombëtar më 11 dhjetor nuk mund ta ndryshojë askush.

“Ka një 11 dhjetor që do ndajë historinë, me të gjitha ndryshimet e nevojshme, do rikthejë lirinë dhe të drejtat e përjashtuara në radhët e PD. Unë ju them se peng-Basha me ndryshimet e paimagjinueshme statusore që i ka lejuar vetes, ka rikthyer format më totalitare në PD”.

“E pranoj plotësisht propozimin e Palokës. Po a e di si i duken ato? Është tmerruar. Futja e formularëve në seli e ka shfazuar komplet. Askush nuk mund të lëvizë as një germë të rendit të ditës të përcaktuar nga anëtarësia. Ky proces dëshmoi se sa shumë ishin larguar nga baza. Ndaj edhe revolucioni paqësor do u japë secilit vendin e tij”.