Pas Elbasanit edhe drejtuesit e Partisë Demokratike në Sarandë kanë bërë kallëzim penal në polici për ndërrimin e bravave të dyerve të selisë në këtë qytet. Manjola Nikollo, Kryetare e LDG-s në Sarandë, kërkoi rihapjen e selisë nga policia, ndërkohë që kryetari i grupseksionit nr.2 në këtë qytet u bëri thirrje anëtarëve të marrin pjesë në referendumin e ditës së shtunë.
Kryetarja e Lidhjes Demokratike të Gruas, Manjola Nikollo, Sekretarja e degës Matilda Qurku dhe kryetari i grupseksionit nr. 2, Albert Jorgji, bën kallëzim penal në policinë e Sarandës, me kërkesë që t`u rikthehet çelësi i bravës së ndryshuar të selisë së Partisë Demokratike në këtë qytet.
Ndërkohë, kryetari i grup seksionit numër dy në Sarandë, Albert Jorgji u bëri thirrje anëtarëve të Partisë Demokratike të marrin pjesë masivisht ditën e shtunë në referendum.
Një ditë më parë, edhe Sekretari i Partisë Demokratike në Elbasan, Blendi Himçi bëri kallëzim në polici, ku kërkonte rihapjen e degës së selisë, pasi me urdhër të Lulzim Bashës dhe Gazment Bardhit i ishte ndryshuar brava.