Pas vendimit të Gjykatës së Arbitrazhit Sportiv për të lënë në fuqi vendimet e UEFA-s, në mënyrë të menjëhershme ka ardhur dhe reagimi i ekipit korçar.
Përmes një postimi në “facebook” Skënderbeu sqaron se ky nuk është një vendim përfundimtar pasi CAS ka refuzuar vetëm kërkesën për pezullimin e efekteve ndërkohë që është pranuar apelimi i vendimit të komisionit të apelit pranë UEFA-s.
Reagimi i Skënderbeut:
“Deklaratë për shtyp mbi vendimin e CAS”
Sot, 14 qershor 2018, CAS (Gjykata e Arbitrazhit Sportiv) ka marrë vendim dhe ka refuzuar kërkesën e KF Skënderbeut, për pezullimin e efekteve të vendimit të komisionit të Apelit të UEFA-s.
Kjo nënkupton refuzimin e kërkesës për të marrë pjesë në kompeticionet europiane deri në marrjen e një vendimi përfundimtar nga CAS.
Për të sqaruar opinionin publik, CAS ka refuzuar vetëm kërkesën për pezullimin e efekteve ndërkohë që është pranuar apelimi i vendimit të komisionit të apelit pranë UEFA-s. Vendimi përfundimtar do të merret në muajt në vazhdim.
Klubi dhe zyra ligjore mbetet besimplotë se vendimi përfundimtar do të jetë në favor të KF Skënderbeut.
Me respekt,
KF Skënderbeu
