Siç duket këto nuk janë ditë të mira për klubin e Bayern Munich, ecuria e keqe e bavarezëve, që gjenden të tretët në klasifikim, katër pikë pas Dortmundit kryesues, ka rritur pakënaqësitë ndaj Niko Kovac.
Kampionët në fuqi të Gjermanisë, shkojnë në klasiken e fundjavës me verdhezinjtë duke i shikuar rivalët nga poshtë lart në klasifikim për të parën herë që nga sezoni 2011-2012-të dhe kjo është veç të tjerash nisja më e keqe e Bayern-it, me 20 pikë pas 10 javësh, që nga sezoni 2010-2011.
Jemi të dëshpëruar dhe të zhgënjyer u shpreh Neuer. Ndërkohë Muller është një nga katër protagonistët e revoltës në dhomat e zhveshjes ndaj Kovac, që nuk fiton në Alianz Arena prej 4 ndeshjesh. E përditshmja ‘Kicker’ shkruan se bashkë me të kanë dalë kundër trajnerit dhe Hummels, Robben dhe Ribery, këta të fundit, rastësi apo jo ishin të njëjtët që kryesuan rebelimin kundër Carlo Ancelottit një vit më parë.
Bayerni është përpjekur të bashkojë ekipin përreth Niko Kovac, por është përballur me kundërshtimet e peshave të rënda në dhomat e zhveshjes, ndërsa ‘Kicker’ konsideron se edhe drejtori sportiv Hasan Salihamdizic ka mungesë autoriteti.
Ribery, Hummels dhe Muller nuk janë të kënaqur me politikën e rotacionit të Kovac, ndërsa Roben është lodhur me zëvendësimet duke qenë se është larguar nga fusha e lojës para përfundimit të ndeshjeve plot 13 herë këtë sezon.
