Pas tri humbjesh radhazi dhe sërish përballë Mançester Sitit, por që këtë herë do ta presin në shtëpi (Atalanta i luan ndeshjet në “San Siro”), trajneri Xhanpiero Gasperini kërkon të shpresojë deri në fund, ndonëse do ta kënaqte edhe Liga e Europës.

“Kjo ndeshje e dytë radhazi kundër Sitit do të na tregojë më qartë se cili është objektivi që mund të vazhdojmë të ndjekim në Europë. Renditja thotë se kemi ende shpresa për një kualifikim, ndonëse jemi me shumë vonesë me pikët (ende zero). Por besoj realisht se në shtëpinë tonë do të jetë një tjetër histori, sepse këtë herë ndeshja nis fatmirësisht nga 0-0 dhe pavarësisht ekipit madhështor të Guardiolës, as ata nuk janë të pathyeshëm. E rëndësishme është të nisim të bëjmë pikë dhe të shohim se si do ecim. Fundja, edhe nëse e mbyllim të tretët, edhe Liga e Europës nuk është një objektiv i keq”.

Për sa i përket formacionit, Berat Gjimshiti, qendërmbrojtësi i Kombëtares shqiptare, pritet nga minuta e parë përballë Sitit, ndërsa në sulm do të mungojë sërish bomberi Zapata.