Laboratori i drogës që u zbulua së fundmi në Has ka qenë fillesa e operacionit i cili u finalizua mbrëmjen e së dielës, 21 tetor, me arrestimin e 27 personave dhe shpalljen në kërkim të 6 të tjerëve, si pjesë e dosjes voluminoze, hetimi i së cilës ka nisur dy vjet më parë.
Prokuroria e Krimeve të Rënda lëshoi 44 urdhërarreste si dhe udhëroi 100 kontrolle banesash të personave të dyshuar për implikim në trafiqe që janë përmendur gjatë përgjimeve.
Për disa prej tyre ka pasur informacion nga homologët, dhe konkretisht Gjermania.
Një nga personat banesa e të cilit u kontrollua të dielën ishte ajo e Lulzim Berishës, një nga anëtarët e Bandës së Durrësit, i cili po kryen pjesën e mbetur të dënimit në liri me kusht.
Në banesën e tij policia nuk arriti të gjente asgjë që mund ta implikonte.
Mësohet se emri i Berishës ka dalë gjatë përgjimeve ku Avdylajt e shihnin si një mundësi për trafikimin e lëndës narkotike e cila përpunohej në laboratorin e Hasit dhe shpërndahej për në vëndet e BE-së.
Largimi i një pakoje me sasi të konsiderueshme droge, nga laboratori i Hasit ka ngjallur dyshime se ajo mund të ishte në banesën e Berishës, por më pas ka rezultuar se nuk ishte e vërtetë.
Megjithatë sasia e larguar pak orë para kontrollit nuk ka rënë në duart e policisë dhe nuk dihet kush ka qenë destinacioni apo personi që e ka marrë përsipër transportin
Hetuesit thanë se po vijojnë kontrollin në disa qytete të Shqipërisë ku ka informacion se ka persona të implikuar në trafikun e drogës që mësohet se ka përdorur dy linja për trafikim, atë të Shëngjinit dhe Semanit.