Tarifat e studimit ishin arsyet e protestes së studentëve ndaj kryeministrit Edi Rama ditën e hënë.

Por ato që kreu i qeverisë nuk pranoi t`i dëgjonte pasi urdhëroi nxjerrjen jashtë, studentët, aktivistë të Lëvizjes për Universitetin të pranishëm në konferencë, i thonë për Ora News.

Irdi Ismaili: I morën vajzat, i ngritën peshë dhe i nxorën jashtë. Njëra nga vajzat u dëmtua pak. Kjo tregon që ai i ka frikë këto nisma, po mundohet të mbulojë gënjeshtrat e veta që ne kemi arsimin më cilësor, ne u japim bursa studentëve. Ku janë këto bursat e studentëve? Unë jam student dhe nuk kam bursë.

Kërkesa kryesore është zerimin e tarifave. Sipas tyre ato janë të papërballueshme për buxhetet e varfra të familjeve shqiptare ndërsa krahasuar me fqinjët dhe më tej me shtete të tjera në Europë, janë të larta.

Irdi Ismaili: Duke krahasuar rrogën minimale dhe mesatare me tarifat e shkollës, ne kemi tarifat më të larta në 25 shtete. Kemi fqinjin tonë Greqiqë që e ka zero tarifën.

Tarifat përbëjnë shqetësimin e pjesës më të madhe të studentëve, të cilët thonë se janë të detyruar të punojnë për te përballuar studimeve te larta.

Studentja: Ka mundësi që të jetë dhe më e vogël në mënyrë që të jetë e përballueshme për të gjitha llojet e ekonomive.

Studentja: Mund të ketë studentë që nuk e përballojnë dot, kështu që mund të ishte dhe më e ulët

Studentja: Duhet të punojnë shumë natë e ditë vetë, që t'ia dalin.

Teksa në Shqipëri tarifat rëndojnë xhepat e studentëve dhe familjarëve të tyre, në shumë shtete të Europës me zhvillim të lartë ekonomik taksat universitare janë zero.

Të tilla janë Norvegjia, Danimarka, Islanda, në të cilat arsimi publik ofrohet falas në të gjitha nivelet.