Zëvendëskryeministri i Kosovës, Fatmir Limaj, ka thënë se nuk do të ndalet së angazhuari për t’u bërë të gjithë bashkë në dialogun Kosovë-Serbi.

Limaj është shprehur i bindur se partitë politike mund të gjejnë rrugën dhe formën e bashkëpunimit për këtë temë.  Ai ka thënë në Klan Kosova se ka kontakte të vazhdueshme me Isa Mustafën dhe partitë tjera opozitare.

“Kjo është tema kryesore. Të gjithë duhet të jenë të kyçur nga fillimi. Ne mund të ndërtojmë një marrëveshje mes partive politike. Ky proces është me përgjegjësi. Opozita nuk është deklaruar kundër dialogut. Dallimi mes neve të gjithëve është qasja dhe mënyra se si e shohim. Prandaj edhe ka hapësirë", është shprehur Limaj.

"Kosova nuk e ka luksin të shkojë e të vëzhgojë. Unë nuk ndalem dhe do të flas me secilin nga dy taborët sepse është e vetmja rrugë për të qenë bashkë. E kam takuar Isa Mustafën dhe kemi kontakte të vazhdueshme. Jam i bindur se mund të gjejmë rrugën dhe formën e bashkëpunimit në këtë temë. Nuk do të ndalem deri sa të bëhemi bashkë në këtë temë të rëndësishme”, ka thënë ndër të tjera Limaj.

Më tutje, Limaj ka thënë se pas kthimit nga Brukseli do të vazhdojnë përpjekjet për të pasur një qëndrim unik për dialogun. Sa i përket mundësisë se zgjedhjeve, Limaj ka thënë se kjo është e parëndësishme në raport me çështjen e dialogut.