Më 16 korrik 1988 Këshilli Gjyqësor i Kolegjit Penal të Gjykatës së Lartë, i përbërë nga Fehmi Abdiu (kryetar, relator) dhe Fatmira Laskaj e Lili Robo (anëtarë), duke pasur pranë prokurorin Skënder Breca, në bazë të nenit 172/1 të Kodit të Procedurës Penale, la në fuqi vendimin e Gjykatës së Kukësit për dënimin me vdekje të Havzi Nelës. Anëtarët e Presidiumit të Kuvendit Popullor, u mblodhën për të diskutuar faljen e jetës. Ata nuk ishin anëtarë efektivë, mund edh të mungonin. Skulptori Kristaq Rama ishte njëri prej tyre. Ai la studion, la një punë për të nënshkruar një vdekje. Më 8.8.1988 Presidiumi i Kuvendit Popullor, me nënshkrimet e anëtarëve: Rita Marko (nënkryetar), Sihat Tozaj, Eleni Selenica, Kristaq Rama, Lumturi Rexha, Rahman Hanku dhe të anëtares tjetër Emine Guri (me telefon) vendosi ekzekutimin e Havzi Nelës.