Mbretëresha Elisabeth ka miratura kërkesën e kryeministrit Boris Johnson për të pezulluar punën e parlamentit duke nisur nga muaji i ardhshëm për të mos i dhënë mundësinë deputetëve të bllokojnë planin e shefit të qeverisë për një Brexit pa marrëveshje.

Sipas mediave ndërkombëtare, parlamenti britanik do të kufizojë punën e tij nga data 9 shtator deri në 14 tetor.

Aksioni i ri politik bën që deputetët të mos bëhen pengesë për largimin final të Mbretërisë së Bashkuar nga BE më 31 tetor, pa marrëveshje, siç është shprehur edhe kryeministri Johnson.

I pyetur nëse, po i mohonte deputetëve të opozitës mundësinë për të ndalur një Brexit pa marrëveshje, Johnson është shprehur:

"Jo, kjo është plotësisht e pavërtetë. Ne po sjellim një program të ri për krimin, spitalet, duke u siguruar që kemi fondet e duhura."

Ai shtoi se do të ketë "kohë të bollshme" për deputetët për të debatuar Brexit si përpara ashtu edhe pas një samiti "thelbësor" të Brukselit të liderëve të BE-së më 17 tetor. 

Lideri i opozitës Jeremy Corbyn i ka shkruar Mbretëreshës Elizabeth për të shprehur shqetësimin e madh për planin e Johnson për të pezulluar parlamentin, tha një burim i partisë të mërkurën. Corbyn gjithashtu kërkoi një takim me mbretëreshën.

Gjatë punimeve të Samitit të G7-ës në Francë, Boris Johnson i ka qëndruar fort idesë së tij që Britani e Madhe duhet të dalë nga Bashkimi Europian me 31 tetor, me ose pa marrëveshje.

Kujtojmë që institucionet financiare britanike kanë paralajmëruar për pasoja të rënda ekonomike nëse Brexit-i bëhet pa marrëveshje me BE-në.