Bora ka mbuluar rrugët e Parisit, por brenda “Grand Palais” ku stilisti Karl Lagerfeld shfaqi koleksionin e tij couture të “Chanel” për pranverë 2019, ishte një botë krejt tjetër dhe një kthim pas në verën e “Vilës Chanel”.
Ambientet mahnitëse ku u zhvillua sfilata të kujtonin një vilë në Monte Karlo, në jug të Francës, me palma, një shkallë të madhe të dyfishtë që të çonte në një lëndinë të kuruar me një pishinë gjigante në qendër.
Modelet sfiluan nën ritmet e këngëve të këngëtares Mina dhe hapjen e sfilatës e bëri Kaia Gerber, modelja më në zë e momentit dhe fytyra më e dashur për “Chanel”.
Ngjyrat pastel, puplat, zbukurimet, qëndisjet dhe aplikacionet me lule ishin kryefjala e kësaj sfilate, ku modelet dukeshin si personazhe përrallash, pasi “Chanel” gjithmonë ka çelësin e suksesit feminilitetin e ndërthurur me klasin.
