Hakera që besohet se punojnë në interes të Turqisë janë pas sulmeve kibernetike ndaj organizatave të ndryshme qeveritare në Europë dhe Lindjen e Mesme, thotë agjencia e lajmeve Reuters, duke cituar tre zyrtarë perëndimorë të fushës së sigurisë.
Hakerat kanë sulmuar të paktën 30 organizata dhe mes viktimave renditet edhe Shërbimi Informativ Shtetëror Shqiptar, por edhe shërbime të ndryshme të qeverisë greke, qipriote dhe irakiane. Pre e sulmeve kanë rënë edhe organizata civile në Turqi, si Llozha e Frimasonëve.
Sipas Reuters, SHISH tha se sulmet janë drejtuar nga infrastruktura që nuk renditet si e klasifikuar, pra nuk është prekur asnjë “sekret shtetëror” i çfarëdolloj niveli.
Ministria e Brendshme e Turqisë nuk ka pranuar të komentojë për rastin por tha se edhe Turqia ka qenë vazhdimisht shënjestër e sulmeve.
