Pas 10 akteve të miratuara me unanimitet të plotë, Komisioni Rregullator në KQZ duket se do të prishë traditën në miratimin e projekt-aktit për veprimtaritë publike të lejuara dhe të ndaluara për qeverinë 4 muaj para zgjedhjeve parlamentare.

rama basha kqz
Anëtarët e Komisionit Rregullator kanë shqyrtuar dy drafte të projekt-aktit, një i përgatitur nga Komisioneri Shtetëror i Zgjedhjeve dhe një i depozituar nga PD-ja. Për të shmangur pabarazinë në fushatë para zgjedhjeve, KQZ-ja ka përgatitur veprimtaritë që u ndalohen figurave politike në qeveri, si Kryeministrit, zëvendësit të tij, ministrave dhe zëvendësve apo drejtorëve të rëndësishëm.

“Kryeministrit apo ministrit i ndalohet promovimi i projekteve dhe/ose te investimeve, me interes apo shtrirje territoriale kombetare ose vendore ne fushen e transporteve te c’do lloji, te energjetikes, te telekomunikacionit, te veprave ujore te c’do lloji, ne sherbim dhe interes te publikut.

Nuk do të lejohet gjithashtu edhe promovimi nga ana e ministrit përkatës, Kryeministrit apo drejtorëve të sipërpërmendur, promovimin e projekteve dhe/ose te investimeve, kombëtare ose vendore, ne funksion te ruajtjes se mjedisit, te shëndetit, të kultures dhe të arsimit publik, si dhe te infrastruktures, ne sherbim e interes te publikut”, thuhet në draftin e KQZ-së.

PROPOZIMI I RI

Por gazeta “Panorama.al” mësoi se PD-ja ka depozituar një tjetër draft ku shton listën e aktiviteteve që i ndalohen qeverisë. Në draftin e saj opozita kërkon, ndër të tjera, që qeverisë t’i ndalohet e drejta për nxjerrjen e akteve për të falur gjoba apo detyrime tatimore e doganore. “Të ndalohen faljet e kamatëvonesave, të gjobave, të detyrimeve tatimore e doganore; ndalimin e dhënies me koncesion, PPP dhe të çdo kontrate tjetër publike; ndalimin e privatizimeve dhe tjetërsimeve të çdo lloj prone, aseti shtetëror e publik”, kërkon opozita që t’i heqë nga duart qeverisë.

KUNDËRSHTIMI

Por nga ana tjetër, maxhoranca nuk është dakord me nenin tre të projekt-aktit të hartuar nga Komisioneri dhe aq më shumë nga PD-ja. Burime për gazetën “Panorama” bënë me dije se në mbledhjen me dyer të mbyllura që ka zhvilluar Komisioni Rregullator për të dakordësuar paraprakisht draftin që do të votohet nesër, përfaqësuesit e propozuar nga maxhoranca në Komisioni Rregullator kanë kërkuar që pothuajse të gjitha aktivitetet që përmenden në nenin tre të projekt-aktit si të ndaluar, të mos ndalohen.

Mësohet se ata propozojnë që qeveria të zhvilloje aktivitete të tilla, por të ndalohet mesazhi elektoral. Kush thyen rregulloren, propozojnë anëtarët e propozuar nga maxhoranca, të gjobitet nga Komisioni Qendror i Zgjedhjeve. Sipas burimeve, në mbledhjen e Komisionit Rregullator maxhoranca pretendon se duke i ndaluar aktivitetet që përmenden në nenin 3 të projekt-aktit, bllokohet edhe aktiviteti i qeverisë. Megjithatë diskutimet kanë vijuar me intensitet deri në orët e vona të ditës së hënë, pasi sot pasdite Komisioni Rregullator mblidhet për ta miratuar dhe për të kaluar këtë akt duhen të paktën 4 vota pro nga 5 anëtarë që ka Komisioni Rregullator