Kryeministri Edi Rama e ka quajtur futje hundësh në fushatë, bisedën e komisioneres së BE, Mariya Gabriel me kreun e PD Lulzim Basha.

“Dikush në Bruksel duhet t’u thotë komisionerëve që harxhojnë kohën e punës së paguar nga taksat e popujve të Europës, për të bërë videomuhabete elektorale me Lulëzim Bashën, se kjo quhet ndërhyrje në fushatën e brendshme elektorale të një vendi kandidat për në BE!
Në dijeninë time Komisioni Europian nuk e ka zakon të fusë hundët në fushatat elektorale dhe unë pres ta mësoj zyrtarisht e publikisht nga Brukseli, nëse e kam unë gabim e ndoshta komisionerët kanë vërtet të drejtë të bëhen palë kur popujt e Europës zgjedhin qeveritë e tyre!”,– deklaroi Edi Rama në një postim në Twitter.

Deklarata e kreut të qeverisë mund të cilësohet si një përplasje diplomatike mes qeverisë “Rama” dhe Brukselit. Një reagim i tillë kundër BE-së nga një qeveri që thotë se ka si busull integrimin në BE është jo vetëm joetik, por dhe dëshmi të një kursi anti-BE që ka ndërmarrë qeveria “Rama”.

Kryeministri Edi Rama ka përdorur këto ditë disa marrëveshje me vende të huaja për të zhvilluar takime me përfaqësues të këtyre shteteve dhe duke marrë mbështetje elektorale. Edhe pse kjo është një shkelje e Kodit Zgjedhor dhe dukshëm një fushatë e Edi Ramës duke shfrytëzuar institucionet, askush nga opozita nuk u ka thënë këtyre vendeve që po fusin hundët në fushatë.

Ndërkohë sot Edi Rama ka sulmuar hapur Bashkimin Europian dhe një komisioner të rëndësishëm të saj.