Gjatë kësaj jave, përfaqësues të ministrisë së Transporteve kanë qenë në qarkun e Kukësit ku kanë zhvilluar takime me përfaqësues të pushtetit vendor të tre bashkive, si dhe me banorë, sa i takon vendosjes së tarifës për ‘Rrugën e Kombit’.

Në Kukës, pak ditë më parë, ishte edhe ministri Ahmetaj ndërsa në të gjitha diskutimet e bëra në asnjë moment nuk është folur konkretisht se çfarë lehtësirash do të përfitojë banorët e kësaj rruge si përdorues të shpeshtë të saj.

Politiko.al ka mësuar se në tavolinën e diskutimeve janë disa opsione të cilat ministria e Transporteve është duke i diskutuar edhe me kompaninë koncensionare.

Burime të sigurta, i thanë Politiko.al, disa prej lëshimeve që qeveria do të bëjë për banorët e qarkut të Kukësit, sa i takon tarifës te ‘Rruga e Kombit’.

Kështu, po shqyrtohet mundësia që mjetet e transportit publik(linjat e autobusit në Kukës, Has dhe Tropojë) të jenë të përjashtuara nga tarifa. Kjo për të evitur një rritje të çmimit i cili do të ndikonte te banorët.

Një tjetër pikë është që të gjitha makinat e Kukësit dhe zonave përreth, të bëjnë një pagesë vjetore, me çmim të reduktuar. Për t’u identifikuar, këto makina do të vendosin një pullë informuese në xham. Këto pika janë duke u shqyrtuar dhe ende asnjë nuk është zyrtare çka lë të hapur mundësinë që ato të ndryshojnë.

Ndërkohë, mësohet se qeveria nuk do të tërhiqet nga tarifa prej 5 eurosh. Të gjitha makinat që do të kalojnë në ‘Rrugën e Kombit’ do të paguajnë tarifat e mëparshme, me përjashtim të automjeteve të qarkut Kukës, tarifa për të cilat do të jetë e ndryshme por ende nuk është zyrtarizuar sesa.