Partia Demokratike denoncon heshtjen e prokurorisë së Tiranës mbi hetimet për vdekjen e 31 vjeçarit Shkëlzen Qordja, shofer i ministrit të Brendshëm Fatmir Xhafaj. PD dyshon për hetim të njëanshëm të çështjes, pasi sipas saj, organi i akuzës pasi shpalli që ditën e parë vetëvrasjen e shoferit të Xhafajt, pa bërë asnjë hetim, tani ka 10 ditë që hesht.

“ Që kur ndodhi vrasja e shoferit të Xhafajt, qëllimi i vetëm i Prokurorisë së Tiranës është manipulimi i hetimit dhe mashtrimi i publikut, ndaj brenda katër orësh ajo lëshoi një deklaratë të hartuar në zyrën e Fatmir Xhafajt se shoferi është vetëvrarë. Prej atij momenti, Prokuroria e Tiranës është zhdukur dhe nuk po bën më asnjë lloj transparence me shpresën së çështja do të harrohet” thuhet në reagimin e Partisë Demokratike.

Sipas demokratëve kjo heshtje, është e njëjta taktikë që Rama dhe Xhafaj përdorën me audio regjistrimin e pazareve të drogës të Agron Xhafajt. “Ata e shpallen videon false brenda pak orësh dhe që atëhere janë zhdukur” vijon njoftimi i demokratëve.

Sipas Partisë Demokratike, bllokimi i hetimeve për vrasjen e shoferit të Fatmir Xhafajt vërteton përfundimisht se i gjithë sistemi i Prokurorisë kontrollohet nga Edi Rama dhe Fatmir Xhafaj. “Prokuroria e Përgjithshme, Prokuroria e Krimeve të Rënda, Prokuroria e Tiranës, Prokuroria e Durrësit janë të gjitha marioneta në duart e Edi Ramës dhe instrumentet për të mbrojtur krimin në qeveri. Që pas emërimit të Arta Markut, e cila ndryshoi të gjithë drejtuesit e sistemit të Prokurorisë, janë bllokuar dhe zvarritur të gjitha hetimet e rëndësishme kundër krimit, drogës dhe korrupsionit. Pa çlirimin e Prokurorisë nga kthetrat e Edi Ramës nuk do ketë drejtësi të vërtetë në vend!” përfundon reagimi.